ليه المساء

ليه المساء عــوق الشقاوي وطبه
وليه الهبوب تصحي القلب لا بات
وليه القمر يدعي جريح المحبة
ويقول له ياهيه ..ما فات..ما مات
جرحك ظهر لو قلت للوجه خبه
وللحزن في ضحكك رسوم وعلامات
وليه المطر بالذات ريحه وصبه
كنه رسول بين الأحباب بالذات
أشتــاق فيه لشوفــتك.. وآتنبه
للي نسيته من مواقف ونظرات
لا أستانس الخافق ذكر من يحبه
ورجع يراجع في الوناسات ما فات
يا مرتع القلب الحزين ومربه
يزيين بك مثل الذهب صدر الأبيات
هيهات ينسى القلب شخص" لعبه
وهيهات يدله خاطري منك هيهات
سبك مديح.. ومدح غيرك مسبه
تقول واذني صوتها تقول لك هات
ونبع الغلا عندك .. وعندي مصبه
ومن الولاء.. في خافقي لك ولايات
وطيفك حطب عيني وعيني مشبه
والشــووق برد" ما أنقطع لو لحظات
ومكانك الصــدر ولك القلب شبه
بين الضلــوع اللي فردها التنهات
ولك بيــرق" فالقلب حبك يهـبه
شامخ ولا هزه من العذل غارات
محبـــتك فالوقت ذا ماتشـبه
إلا بخيمة بــــدو بين العمارات
أن شفتني ضايق .. و أهوجس .. وأسبه
أخاف غدر الوقت .. والوقت دورات
لا تحسبن دمعي نزل دون سبه..؟؟
أبكي من الفرقا.. وهي مابعد جات..!
اليوم كل أمــورنا مستتــبه
وبكره ماندري وش معه من مسرات
أرب قلــبك مثل قلــبي أربه
ما يخلفه كثر العــذل.. والمسافات..؟؟...